Nangapudan si Sen. Benigno “Bam” Aquino nin masusing pagsusuri sa paggastos kan Department of Public Works and Highways (DPWH) sa P360 bilyong pondo para sa flood control ngunyan na taon, sa tahaw kan padagos na problema sa pagbaha sa kadakol na parte kan nasyon.
Sa pigsunad na resolusyon, pig-inkaminar ni Aquino an mga komite kan Senado na magsagibo nin imbestigasyon tangani matukoy kun epektibo an mga proyekto kan DPWH asin kun napasiring sa tamang lugar an pondo.
Sigun sa lehislador, magpuon 2009 hasta 2024 nagpakol na sa P1.47 trillion an kabilogang kantidad kan flood control budget, alagad nagtitinir na bulnerable sa pagbaha an kadakol na komunidad.
Dae bastante an infrastructure kun dae ini nakabase sa siyensiya asin man sa aktuwal na pangangaipuhan kan mga komunidad
Apwera sa resolusyon, naglataw man an mga report kan soboot pekeng flood control projects na pinaboran an piling contractors.
Sa sarong suhay na imbestigasyon kan Senate Blue Ribbon Committee, tinukoy an haros P100 bilyong kantidad kan proyekto na posibleng may anomalya, kabali na an mga proyektong dae natapos, dae kaipuhan, o pauru-utro sa parehong lugar.
Binanggit ni Aquino an importansya kan transparency asin accountability sa paggastos nin pondo, orog na man an epekto kan pagbaha na direktang na-eeksperyenyahan kan taumbayan—magpuon sa pagkaraot kan ari-arian hasata sa peligro sa buhay.
Bako sana ini urulay kan kwarta. Kundi urulay nin kasalbaduhan, nin kabuhayan, asin kan tiwala kan taumbayan sa gobyerno
Nilalaoman na pag-uulayan kan Senado an resolusyon sa masunod na sesyon, mantang padagos an pag-uuran asin man pagbaha sa pirang rehiyon sa nasyon
