Naglagak nin piyansang P90,000 si dating Senator Ramon “Bong Revilla Jr. sa kasong graft may kinaaraman sa P92.8 million ghost flood control project sa Pandi Bulacan.
An piglagak na piyansa ni Revilla para sa sa kasong graft sa Fourt Division Clerk of Court kan hapon nin Martes, Enero 20 huli ta mayong kaukulang piyansa an saiyang kasong malversation.
Buot sabihon na dae pa man mapapalibre si Revilla mantang nakabinbin an kasong malversation sa anti-graft court.
Sa ngunyan, nakadetine si Revilla sa New Quezon City Jail sa Payatas, basado sa commitment order na pigluwas kan Sandiganbayan Third Division.
Nahahampang an dating Senador sa mga kasong graft asin malversation of public funds through falsification of public documents sa Sandiganbayan Fourth asin Third Division.
An mga kasong pigsunad kan Office of the Ombudsman makalihis an pigsagibong imbestigasyon sa pakikipagtabang sa Department of Justice, kun saen may nahiling na probable cause na mayong proyektong nagibo dawa pa ini pigdeklarar kumpleto na o natapos na.
