Nagprotesta an ribu-ribong katawo sa Ankara, Turkey kun saen ipinangapodan kan mga ini an pagbubutas na sa pwesto ni President Recep Tayyip Erdogan.
Ginibo kan nagkapirang mamamayan sa nasambitan ng nasyon an rally kasunod kan kadakol na taon nang legal crackdown sa mga miyembro kan Republican People’s Party (CHP) siringman an nakaambang pagpapatalsik sa presenting lider kan Republucan Peoples’ Party (CHP) asin lider kan Main Opposition na si Ozgur Ozel sa tahaw kan nakatalaang paghatol kan korte kasuodma, Lunes, Setyembre 15.
Sa pagdangog kasuodma, nakatalaang baliktadon an resulta kan botohan sa CHP congress kan nakalihis na Nobyembre 2023 huli sa soboot nangyayaring pandaraya sa mga boto.
Alagad komo pagpapahiling kan pagtutol sa pagdangog kontra sa Opposition leader, nagtiripon-tipon an mga miyembro kan Partido sa Tandogan Square sa Ankara, banggi antes an pagdangog kasuodma.
Sa sarong footage, madadangog an mga protester na nagkukurahaw para sa pagbubutas kan Presidente kan Turkey mantang pigwawagayway an bandera kan saindang nasyon asin banners kan Partido.
Pigkondenar man ni Ozel an isasagibong pagdangog komo parte kan soboot kudeta kan gobyerno kan Turkey kontra sa oposisyon.
Inapod man kaini an kaso na politically-motivated asin an mga alegasyon an sarong klase kan slander.
Enot digde, nagkapirang miyembro na man kan nasambitan ng Partido an naikulong huli sa akusasyon kan korapsiyon asin terorismo kaibahan na an primerong karibal sa pulitika ni Erdogan na si Istanbul Mayor Ekrem Imamoglu.
