Ribu-ribong mga tawo sa Denmark asin Greenland an nagprotesta tanganing tutulan an prosopwesto ni U.S. President Donald Trump na bakalon an Greenland sa Denmark, asin pighurot na dapat an Arctic territory mismo an madesisyon sa futuro kaini.
Sa Copenhagen, nagmartsa an mga demonstrador pasiring sa US embassy, mantang pigkukurahaw an “Greenland is not for sale” asin igwang dara-darang mga banner na No means No” asin “Hands off Greenland”, kaibahan an pulang-puting watawat kan Greenland.
Igwa man nagkapira na nakasulot nin pulang baseball caps na kahawig kan “Make America Great Again” ni Trump, alagad nakasurat na “Make America Go Away.”
Pigkakarkulong labi 20,000 katawo an nag-atendir sa protesta sa Copenhagen haros katumbas kan populasyon kan kabisera kan Greenland na Nuuk mantang naganap an mas sadit na numero kan mga nagprotesta sa iba pang parte kan Denmark.
Sa Nuuk, ginatos na demonstrador, kaibahan si Prime Minister Jens-Frederik Nielsen, an nagmartsa pasiring sa US consulate, kapot an mga watawat asin banner.
Marurumduman na sinaysay ni Trump na importante an Greenland sa seguridad kan US huli sa estratehikong lokasyon asin yamang-mineral kaini, asin dae piggilid an posibilidad kan paggamit nin military forces tanganing makua ini.
Nagdara man nin diplomatic crisis sa tahaw kan US asin Denmark an nagin pahayag ni Trump kun saen kinondenar kan NATO.
An Greenland, igwang populasyong 57,000, igwang dakulang autonomy puon pa kan taong-1979 alagad nagtitinir na nasa irarom kan kontrol kan Denmark pag-abot sa defense asin foreign policy.
Poco mas o menos 17,000 Greenlanders an nakaistar sa Denmark, asin gabos kan limang partido sa Greenland parliament an paboy sa pagkakaigwa nin kalayaan sa maabot na panahon, alagad mas pigpili muna nindang magtinir sa Denmark kaysa mag-anib sa Amerika.
