Ribu-ribong pulis an naglusob sa Kingdom of Jesus Christ o KOJC compound sa Davao City pasado alas tres kasubagong mag-oomagahon.
Ini an tanganing isirbi an pigluwas na “alias arrest warrant” kan Pasig regional trial court kontra ki Pastor Apollo Quiboloy asin mga kapwa akusado kaini. Si Quiboloy an nahahampang sa kasong child abuse, sexual abuse asin human trafficking.
Ipinabasa mismo ni Davao Regional Director Police Brig. Gen. Nicolas Torre III sa legal counsel kan Kingdom of Jesus Christ na si Atty. Israelito Torreon an kopya kan warrant of arrest.
Sa paghampang sa mga kagawad kan media ni Toree, sinaysay kaini na duwang ribong pulis an sabay-sabay na naglaog asin maghalughog sa laog kan 30 ektaryang KOJC compound. Pig-enkaminar ni Torre an legal counsel kan Kingdom of Jesus Christ na sa korte na sana magreklamo kun sa hiling ninda an iligal an saindang operasyon. Antes ini, nagpatanid si KOJC Executive Secretary Eleanor Cardona na magmamartsa an walong milyong kingdom citizens pasiring malacañang enkaso ipadagos kan pulsiya an pagsugod sa saindang compound.
Mientrastanto, nagtutubod man an Philippine National Police PRO – 11 na maaarestrar ninda ngunyan na aldaw an nagtatagong puganteng pastor na si Apollo Quiboloy asin an mga kapwa akusado kaini. Sigun pa ki Torre, padagos an saindang paghahanap sa laog kan KOJC compound sa pagtubod na nasa laog kaini nagtatago si pastor. Nangangapodan man ini ki Quiboloy na magsuko na asin dae na pagpasakitan an saiyang mga supporters asin tagasunod.
Sa ngunyan an bantay sarado kan pulisya an bilog na palibot kan compound mantang isisirbi an warrant of arrest laban sa mga akusado. Sinaysay pa kan opisyal na sa ngunyan a matoninong sindang makakahiro sa laog kan nasambitan ng compound.
