Pig-inkaminar ni Bicol Saro Partylist Rep. asin chairman kan House Committee on Public Accounts Terry Ridon sinda dating House Speaker Martin Romualdez asin man dating Ako Bicol Rep. Zaldy Co na maghampang sa Senado.
Pinangapudan ni Ridon na makakamaray na hampangon ninda Romualdez asin Co an imbestigasyon kan Senado asin kontrahon an akusasyon ni Retired Marine Orly Guteza makalihis na ideklarang palsipikado an notaryo kan sworn affidavit kaini na isinumiter sa Senate Blue Ribbon Committee.
Ini na makalihis magluwas nin desisyon si Manila Regional Trial Court Executive Judge Carolina Icasiano Sison na peke an notaryo kan sworn affidavit ni Guteza na isinumiter sa Senate Blue Ribbon Committee hearing katakod kan maanomalyang flood control projects.
Sigun sa notaryadong testimonya ni Guteza, ini an kaiba na nagdadara nin bilyong-bilyong kwarta na pararehas na naka-maleta sa harong ninda Romualdez asin Co komo komisyon sa mga maanomalyang flood control projects kan gobyerno.
Sigun pa ki Ridon an desisyon kan korte sa pekeng notario kan sinumpaang salaysay ni Guteza an nagpaluya kan posisyon kaini komo testigo asin man mahahampang pa ini sa kasong pagpapalsipika kan dokumento.
Pigtawan duon pa ni Ridon na an mga legislative inquiries kan Senado asin Kamara an nakadepende sa authenticity kan mga dokumento kaya man kun an mga ini an talagang palsipikado tangani manipulahon an investigation proceedings dae sana ini maikokonsiderar na pag-atake sa siisay man na inaakusaran kundi sa bilog na Kongreso.
