Sa tahaw kan huma kan panibagong airstrikes kan Israel, rinibong Iranians na an nagkukumahog na makatakas para sa saindang kasalbaduhan.
Sa darakulang siyudad siring kan Tehran, mahihiling an halabang pila nin mga lunadan na nagpapairinutan na makahali sa kabisera pasiring sa lugar harani sa border kan Türkiye.
Sa ibang mga siyudad sa Iran siring kan Shiraz sa south-central Iran, hili-hilera man an mga lunadan sa mga gasolinahan.
Igwa nin mga lunadan man na lunad an saindang pamilya asin pano nin mga suplay pasiring sa rural areas, na harayo sa punterya kan Israel.
Naenot na man na nagluwas nin nasyon an Israeli military na nag iinkaminar sa mga residente kan Tehran na tulos na mag ibakwar.
Nagbanta man an Israeli military na sa mga masunod na oras mago-operate sinda sa Tehran tangani tamaan an military infrastructure kan Iranian regime.
Naenot na man na pig abisuhan ni US President Donald Trump an gabos na tulos maghali sa Tehran.
An mga pag-atake kan Israel sa kabisera kan Iran an parte kan pig-apod ni Israeli Prime Minister Benjamin Netanyahu komo “preemptive strike” kontra sa sekretong programa kan Iran na paggibo nin nuclear bomb, kun saen igwa nin kapasidad na soboot an Tehran na maggibo nin 9 na nuclear bombs, na sigun man sa International Atomic Energy Agency (IAEA) an pagbalgar sa obligasyon kaini sa irarom kan nuclear non-proliferation treaty.
