NAGA CITY- Pigtawan duon kan Barangay Kapitan sa Igualdad, Naga City na mayong pinipili an saindang lado tuyong nagkukundusir nin road clearing operation sa saindang lugar.
Sa entrevista kan Bombo Radyo Naga ki Angelo Romano Bendiola, Barangay Kapitan sa Igualdad, Naga City, sinaysay kaini na importante an pagkundusir nin road clearing operation nin huli ta mas mapaparekas kaini an pagresponde enkaso igwang emerhensiya.
Katakod kaini, sa ibong kan maraot na feedback gikan sa iba, dagos an operasyon asin mayo soboot digdeng pinipili mapa mayaman o bako.
Dugang pa kan opsiyal, masakit an saindang trabaho alagad kaipuhan na mag-utob nin huli ta igwang DILG Memorandum na dapat sunudon dapit sa road clearing operation, na kun saen nakapalaman na enkaso dae maimplementar an igwa man penalidad na kakahampangon an saindang lado.
Sa ngunyan, pigsierto na sana ni Bendiola na ara-aldaw an saindang pagpapagirumdom sa publiko na magsunod sa manlaen-laen na ordinansa o kasuguan na pig-implementar sa saindang lugar tangani man na malikayan an kariribukan.
