Nangapodan si dating presidential spokesperson Harry Roque asin mga tagasuporta kan Kingdom of Jesus Christ (KOJC) ki Pres. Ferdinand Marcos Jr. na magbutas na sa pwesto.
Sa indignation rally sa Liwasang Bonifacio, bitbit kan mga nagpartisipar sa hiro- protesta an mga placards na nakasurat an mga tataramon na “Marcos resign” o “BBM resign” mantang an iba igwa nin kapot na bandera kan Pilipinas asin nagkukurahaw nin“justice for KOJC.”
Magigirumduman na nagkampo sa airport road sa Davao City an mga miyembro kan KOJC na nagkawsa nin abala sa mga residentes asin sa mga pasahero kan pagtaraid kan Davao International Airport.
Kasunod ini kan paglusob kan mga otoridad sa compound, Sabado nin aga tanganing arestaron si Quiboloy na hasta ngunian padagos pa man giraray na nagtatago.
Sigun sa Police Regional Office 11, an saindang mga unit dai mahali sa lugar hasta sa dai naaarestar an puganteng pastor na nagsasagin-sagin na ‘Appointed Son of God.’
Si Quiboloy nahahampang sa mga reklamong pagbalgar sa Section 5(b) kan Republic Act 7610 o Special Protection of Children Against Abuse, Exploitation, and Discrimination Act sa irarom kan Section 10(a) sa Quezon City court.
Nahahampang man ini sa non-bailable Qualified Human Trafficking charge sa irarom kan Section 4(a) kan Republic Act No. 9208, na inamyendaran sa Pasig court.
Mientrastanto, nagtitiner pa man giraray an P10 milyon na reward sa siisay man na makakapagtao nin impormasyon para sa ikaaaresto ni Quiboloy.
