Kasunod kan pagtugot kan Estados Unidos na tugotan an Ukraine na gamiton an mga missile kaini na igwa nin halawig na distansya, an Russia ngonyan nagpapatanid na iisipon ninda ini komo sarong bagong paglangkaw sa gera kan Rusya asin Ukraine.
Susog ki Russian Press Secretary Dmitry Peskov, kun totoo na nagtao nin permiso an US sa Ukraine na gamiton an siring na mga missile, nangangahulugan ini na nagrararom an soboot ‘involvement’ kan US sa nagpapadagos na giyera.
Susog ki Peskov, an lakdang ni Biden hayag na nagpapadakula kan tensyon sa giyera sa pag-ultanan kan duwang nasyon, sa ibong kan pirang semana na sana an natatada sa administrasyon kan bago na presidente kan Estados Unidos.
Pigsaysay pa man kaini na pigkokonsiderar ini kan Moscow na sarong probokasyon sa parte kan White House.
An Presidente kan Ukraine na si Volodymyr Zelenskyy enot na nag-apod sa Estados Unidos para sa awtorisasyon na gamiton an mga missile kaini sa padagos na gera laban sa Rusya. Sa lado man kan Ukraine, pigkumpirmar kan presidente na an siring na mga misilles dai pa nagamit.
