Nagpapadagos an kampanya kan mga nagbibilog kan Tanggol Wika sa bilog na nasyon tanganing orog na maibusol an paggamit kan lenggwaheng Filipino sa mga estudyante.
Sa entrevista kan Bombo Radyo Naga ki Dr. David Michael San Juan, Convenor, Tanggol Wika, sinaysay kaini na na-isunad na soboot an sarong prosopwestong ley na nagre-required na magin subject an Filipino sa Curriculum sa Kolehiyo.
Naglalaom an Tanggol Wika na ini an susuportan sa Kongreso asin Senado tanganing maipautob an obheto kan prosopwestong ley.
Apwera digde, saro pa sa mga pigkakaabalahan kan Tanggol Wika sa bilog na Pilipinas an pagtaguyod kan Mother Tongue-Based Multilingual Education.
Kamawotan ninda na maibalik ini komo required program tanganing mas makanood sa sadiring wika an mga kajovenan.
Sigun pa ki San Juan importante na matutukan pa man giraray an paggamit kan wikang Filipino nin huli ta panalmingan ini kan mga Pilipino asin parte kan kultura kan nasyon.
Sa mga paaging nasambit, naibubusol an karahayan kaini sa lado kan edukasyon orog na sa usapin kan pagkanood kan mga kaakian.
Dakulang katabangan kaya na naaapresyar kan mga estudyante orog na kan mga kajovenan an wikang Filipino tanganing dagos man an pagtalubo kaini.
Sa ngunyan, hagad na sana liwat ni San Juan an suporta kan gabos para sa pagbusol kan wikang Filipino sa bilog na nasyon.
