NAGA CITY- Nawasak an haros kabanga kan sarong closed van makalihis na makabudal sa sarong bus na nayupi man an enotang parte sa Andaya Highway, GRS, Ragay, Camarines Sur.
Sa entrevista kan Bombo Radyo Naga ki Neopito Tipay Jr, Municipal Disaster Risk Reduction Management Office ng Ragay, Camarines Sur, sinaysay kaini na tuwid an tinampo asin kakadikit sana an nag-aaging behikulo sa lugar kan mangyari an aksidente kun kaya pinagtutubudan na nakaturog an driver kan closed van.
Marurumduman, enot naman na nagluwas sa imbestigasyon kan mga otoridad na kinakan kan closed van an linya kan kasulbudan kaining bus, alagad huli sa kusog kan impact nawasak an haros kabanga kan behikulo na nagin rason kan pagkagadan kan driver asin pagkalugad naman kan helper kaini.
Mantang nagsapo man nin minor injury an driver kan bus asin maswerte man na mayong nadamay sa mga pasahero kaini. Mientrastanto, nagpapadagos pa an piggigibong imbestigasyon kan mga awtoridad dapit sa nasambitan ng insidente, alagad hasta sa presente dae pa soboot ninda nakakaulay an helper kan nasambitan ng bus huli sa pigsapo kaining injuries.
Huli man sa padagos na paglangkaw kan numero kan naiirehistrong aksidente sa tinampo kun kaya mas hihigotan kan saindang opisina an pagsasagibo nin mga lakdang tanganing malikayan ini, siring na sana kan pagbubugtak nin mga signages sa mga gilid kan tinampo.
Apwera pa digdi, pabubugtakan man soboot ninda nin CCTV cameras sa lugar tanganing ma monitor kun ano an nangyayari sa lugar magin mga warning signs para sa mga drivers na magbawas nin speed.
An nasambitan ng lakdang an huli ta karaniwan kaya mas nagpaparekas an mga drivers kun tuwid asin mahewas an mga tinampo na kadalasang nagigin kawsa kan aksidente.
