NAGA CITY- Nagtutubod an sarong abogado na dae tutugutan kan gobierno nin Netherlands an pighahagad na asylum ni Atty. Harry Roque.
Sigun ki Atty. Dino De Leon, Public Interest Lawyer and Alumnus of the Hague Academy of International Law dae qualified si Roque para sa asylum nin huli ta pighahagad sana ini kun politically persecuted o igwang persecution.
Alagad sa kaso ni Roque, pighahanap soboot ini sa irarom kan batas kan nasyon huli sa mga dae nasisimbagan na mga kahaputan na igwang kinaaraman sa pagkaka-imbwelto kaini sa POGO operations sa Pilipinas.
Dugang pa ni De Leon, dae naman pigkua na parte kan Legal Councel ni dating Presidente Rodrigo Duterte si Roque kaya duda soboot ini na iga-grant kan Netherlands an pighahagad na asylum.
Pigtawan duon pa kan abogado na si Roque an dating tagapagtaram ni Duterte saro man ini sa mga nagdepensar sa war on drugs kan Duterte Administration kun saen kadakol an binawian na buhay huli sa Extra Judicial Killings.
Pigsaysay pa ni De Leon na mismong an alma mater ni Roque inapod ini na igwang poor track record sa pagpromoter kan human rights. Saro soboot si Roque sa mga nagpersecute kan kadakol na tawo.
Mientrastanto, liwat man na pigtawan duon kan nasambitan ng abogado na legal an pagkaka-aresto ki dating Presidente Duterte nin huli ta igwang warrant of arrest gikan sa ICC.
Katakod kaini, pwedeng isuko kan Gobierno nin Pilipinas an siisay man na indibidwal na igwang kasong kinakahampang orog na kun crimes againts humanity ini, saro sa mga krimen na pigkokonsederar komo pinakamaraot na krimen kontra sa sangkatauhan.
Apwera digde, dae man soboot masasabi na kidnapping an nangyari huli ta igwang warrant of arrest asin kaibahan si Atty. Salvador Medialdea sa eroplano na piglunadan kan dating Presidente.
Kun hahaputon kun igwang politika na imbwelto pirme man soboot igwa alagad nasa pag-ultanan na ini kan Duterte asin Marcos family.
Dugang pa ni De Leon, dae pwedeng basulon ni Vice Presidente Sara Duterte an Armed Forces of the Philippines nin huli ta an mandato kan militar na proteheran an estado.
Kaipuhan soboot na mainditihan kan mga Duterte na mayo na sinda sa poder asin kaipuhang pairalon an ley.
Sa ngunyan, hagad na sana kaini na sa panahon kan kariribukan kasabay sa pagkaka-arestrar kan dating Presidente dae soboot malingawan an mga biktima kan Extra Judicial Killings asin iba pang klase kan pagbalgar sa derechos humanos kan mga Pilipino sa irarom kan dating administrasyong Duterte.
