NAGA CITY – Kapagteosan an nagin inspirasyon kan sarong Bikolanong tubong Nabua, Camarines Sur tanganing mawoton asin paglapigotan kaini na makalaog sa top notchers sa natapos pa sanang Civil Engineering Licensure Examination April 2024.

Sa entrevista kan Bombo Radyo Naga ki Engr. Marvin Ballecer Abugao, Top 4 sa nasambitan ng eksaminasyon gikan Camarines Sur Polytechnic College, Nabua, sinaysay kaini na huli sa saiyang naeksperyensiyahan na kapagteosan sa buhay, pinaglapigotan kaini na makabali sa Topnatchers tanganing maski purupano, an makaangat-angat sa buhay.

Antes pa man maaraman an resulta kan eksaminasyon, naiisip na kaini an mga negatibong bagay siring na sana kan saiyang mga salang simbag sa eksam nin huli ta ini an saiyang premirong pagtake kan nasambitan ng exam.

Alagad kan mahiling soboot kaini an saiyang pangaran sa mga listahan kan mga nakapasar, mas orog ining kinabahan huli naman sa sobrang kaogmahan.
Mientrastanto, halabang preparasyon man an ginugol kaini na nag-abot nin haros sarong taon nin huli ta nagkaproblema soboot sa saiyang papeles asin pangaran.

Katakod kaini, kadakol naman an nagtao ni offer sa saiya alagad kadakol pa man soboot ining pigkokonsiderar.

Sa ngunyan, abiso na sana ni Abugao sa mga mawot man na magtake kan nasambitan ng eksaminasyon na dapat sa kolehiyo pa sana, basog na sa mga basic concepts tanganing dae na gayung madipisilan sa pagrereview.

Siringman, labi man ining nagpapasalamat sa gabos na tawo na nasa likod kan siyang trayumpo orog na an saiyang mga magurang na preparadong mabaon sa utang maito sana an saindang pangangaipohan.