NAGA CITY- Dae piglaoman kan nag Rank 1 an nagin resulta kan 2025 Licensure Examination for Architects.
Sa entrevista kan Bombo Radyo Naga ki Architect Ckristel Janssen Larosa Daguio, Rank 1 2025 Licensure Examination for Architects- UP Diliman, sinaysay kaini na mayo man soboot ining special na preparasyon na ginibo apwera sa pag-enroll sa review center.
Sigun ki Daguio, pigsunod sana kaini an schedule na itinao kan review center asin nagtagama nin bastanteng oras asin panahon tanganing makapag-adal antes an eksaminasyon.
Dugang pa kaini, an gabos na kurso na pigta-take kan mga estudyante an dipisil kun kaya importante an pagkakaigwa nin disipilina sa sadiri asin pagsasakripisyo siring kan pagpupuyat tangani sana na maabot an pangaturugan sa buhay.
Alagad sa ibong kaini, pigtawan duon man ni Daguio na kaipuhan an pagkakaigwa nin panahon sa sadiri tanganing mabawasan an pressure na namamatean kasabay kan mga kaplanuhan sa buhay.
Labi man an pasasalamat kaini sa saiyang bilog na pamilya asin mga amigo sa saindang suporta nin huli ta dakulang bagay para sa saiya na igwang mapaghuhugutan nin kusog nin boot na magpadagos.
Sa ngunyan, pig-enkaminar na sana kaini an mga kajovenan na mawot na i-pursue an architecture na magin preparado sa anuman na kakahampangon na problema.
