NAGA CITY – Pabor an sarong highschool principal na ibwelta na sa dati an school calendar tanganing malikayan an extreme weather condition siring kan naeksperyensyahang labing init kan panahon kan nakalihis na summer season.
Sa entrevista kan Bombo Radyo Naga ki Jaime Turiano Esmenda, Jr., principal sa nasambitan ng eskwelahan, sinaysay kaini na kumparar sa mainit na panahon enkaso nag-uuran an pupwedeng maggamit nin payong asin mapresko pa an panahon kun kaya nagtitinir na tolerable para sa gabos an sitwasyon.
Dugang pa ni Esmenda na talagang piglalapigotan na kan mga paratukdo asin kan Department of Education na maibwelta na sa dati an school calendar na enot namang pig-aprubaran kan departamento.
Isasabay na man soboot kan saindang eskwelahan an saindang school calendar sa calendar of activities kan DEPED. Sigun pa ki Esmenda kan panahon kan El Niño naggibo sinda nin ibang lakdang tanganing magpadagos an pagkanuod kan mga estudyante sa tahaw kan mga class suspension huli sa init kan panahon.
Kun sain, nag pautob sinda nin modular learning asin mahigot na pigmomonitor kan mga paratukdo an saindang mga estudyante tanganing masierto na nakakanuod pa man giraray an mga ini.
