Aram baya nindo mga ka-bombo, sinaysay kan sarong gikan sa Ohio na an sarong pagkakamaling nagibo kaini mantang nagbabakal kan saiyang karaniwang Rolling Cash 5 lottery ticket an nagdara sa saiya nin kapangganahan nin $291,000 jackpot.
Pig-istorya kan taga-Avon Lake sa mga opisyal kan Ohio Lottery na balak sana kaining magbakal nin mga ticket na igwang saiyang nakasanayang numero para sa pitong magkakasunod na aldaw.
Alagad napasala ini asin nakabakal nin sarong ticket na igwang saiyang mga napiling numero asin anom na auto pick tickets — gabos sa sarong drawing.
Saro sa saiyang mga auto pick ticket, na igwang numerong 1-14-20-35-37, an nanggana nin $291,000 Rolling Cash 5 Jackpot sa drawing kan nakalihis na Pebrero 10.
Nakatugma man ini sa tolong numero sa saro pang linya kan ticket, kaya nakakua pa ini nin dugang na $10.
Sigun sa saiya, an saiyang napangganahan na kwarta an mataong dalan tanganing mag-untok na ini sa pagmamaneho para sa sarong ride-share service tanganing mas makaibahan an saiyang agom.
Makakatabang man ini tanganing mabayadan an saindang harong, simbagan an gastusong medikal kan saiyang agom asin mabayadan an iba pa nindang utang.
