NAGA CITY-Nangangapudan an sarong miyembro kan LGBTQIA+ Community sa ciudad nin Naga na ipaabot an suporta sa sainda mantang pageantry man an saindang paagi tangani na maiheras an saindang adbokasiya.
Sa entrevista kan Bombo Radyo Naga ki Queen Hugo, miyembro kan LGBTQIA+ Community sa ciudad nin Naga, an Pride Month soboot o an pagselebrar kaini nagpuon sa sarong protesta, partikularmente an Stonewall Uprising na nangyari sa New York kan Hunyo 1969.
May mga nagbago na soboot puon kan protestang ini, kun saen sigun igdi kaipuhan na magpadangat asin magkasararo sa pagselebrar kan Pride, nin huli ta ini soboot selebrasyon kan pagigin sararo asin individuality.
Sigun ki Hugo igdi pinapahiling an manlaen-laen nin mga adbokasiya, sekswalidad, asin genders kan mga miyembro kan LGBTQIA+.
Igdi soboot pigpapahiling na pig-aako asin pigpapadangat an mga miyembros kaini kan sangkatauhan.
Mensahe man kaini sa gabos na ipahiling an suporta sa gabos na proud sa saindang sadiri huli ta may mga beses soboot na may mga tawong dai natatawan nin magkakanigong atensyon huli ta iba an saindang gender orientation o identity.
Sa ngunyan kaipuhan na orog pa soboot nin ipaglaban na akuon asin padangaton kita kan satuyang kapwa mapa-isay man kita.
Medyo masakit man soboot saindang mga miyembro kan trans pageantry na makua an respeto asin equality huli ta sa pirang pageantry siring kan Miss Gay pigsisiringan sana soboot ini kan tawo tangani na magngirit.
An pageants paagi soboot tangani na saindang maiheras an saindang adbokasiya, kun saen naglalaog an pagkakapantay-pantay, alagad pag nagmumukha soboot nin kangirit-ngirit asin kabastos-bastos an mga kalahok igdi, nunca soboot sinda makakakua nin equality asin pagrespeto.
Sigun ki Hugo, ini an rason kun tano saiyang na-aapresyar an mga pageant kun saen pigsasagibong pormal an mga kalahok tangani na dai na mabastos an mga ini.
