NAGA CITY- Pigtawan duon kan sarong Barangay Kagawad an importansiya kan pagkanood dapit sa anti-bullying.
Sa entrevista kan Bombo Radyo Naga ki Natividad Rebellon, Barangay Kagawad kan Balatas, Naga City, sinaysay kaini na igwang mga tawo na maikokonsederar na bully, bako sanang mga jovenes kundi magin sa lado kan mga adults.
Sigun ki Rebellon, importante na aware an mga tawo sa siring na klase kan indibidwal tanganing malikayan an mga ini asin dae pagpuonan nin dakulang problema.
An mga tawo na maikokonsederar na bully, nagdakula sa kapalibutan na kulang sa pag-aataman kan saindang pamilya, may insecurities sa buhay, dae kayang akuon an nagibuhan na sala, habong maangatan kan iba asin self centered na indibidwal.
Kadalasan sa mga ini mahilig mantuyaw nin iba na dae maako na an problema an gikan sa sainda.
Katakod digde, padagos na pigpapagirumduman kan opisyal an publiko na kaipuhan magibo nin lakdang tanganing masimbagan an problema.
Dae soboot pwedeng pabayaan an bagay na ini orog na ta nagkakawsa ini nin anxiety o depression sa mga biktima.
Sa ngunyan, pigsierto na sana kan opisyal na dagos-dagos an saindang ginigibong mga lakdang tanganing masolusyunan an nasambitan ng problema.
