NAGA CITY-Pig-orgulyo kan sarong opisyal an pagkakabali kan siyudad nin Naga komo awardee sa 2024 Seal of Good Local Governance.
Sa nagin paghampang sa mga kagawad kan media ni Ernesto Elcamel, pamayo kan CDRRMO-Naga, sinaysay kaini na kinumpirma na soboot ni Naga City Mayor Nelson Legacion an nasambitan ng pagbisto makalihis na mareseber an imbitasyon na pigpadara kan Department of the Interior and Local Government para sa Awarding Ceremony kan SGLG sa Manila sa maabot na December 9, 2024.
Susog sa surat, pig-assess soboot kan DILG asin kan Council of Good Local Governance an 1,715 na local government units kun saen saro an siyudad nin Naga sa mga LGUs na nakapasar sa standards kan SGLG.
Marurumduman kan nakalihis na Agosto nareseber man kan Naga City an Top 1 Overall Most Competitive Component City award gikan sa DTI kun saen ini na an ika apat na consecutive na taon na naipuli kan lugar an nasambitan ng pagbisto.
Ini man an pigsundan kan Digital Democracy Award na pigtao kan Makati Business Club asin USAID duwang semana na an nakakalihis.
Sa ngunyan, hagad na sana ni Elcamel na mamantinir kan siyudad an siring na mga pagbisto nin huli ta nagpapahiling soboot ini kan tibay asin dedikasyon kan LGU-Naga na mapamarhay an paggogobernar sa siyudad.
