NAGA CITY- Pigtawan duon kan sarong Padi sa siyudad nin Naga na kasabay sa pagselebrar kan Kafiestahan kan Itom na Nazareno kaipuhan na magkaigwa nin pagbabago sa buhay kan sarong tawo.
Sa entrevista kan Bombo Radyo Naga ki Fr. Joey Gonzaga, Works at the Holy Rosary Seminary, Graduate School of Theology and Holy Rosary Major Seminary Archdiocese of Caceres, sinaysay kaini na an debosyon soboot kan sarong tawo an dae natatapos sa pagrani, pagpunas sa Imahe kan Itom na Nazareno kundi dapat igwang nahihiling na pagbabago sa buhay kan sarong tawo.
Sigun pa ki Father Joey, an hararom na pananampalataya kan sarong tawo an kaipuhan na isabuhay asin dae magin limitado sana sa pag-iba sa mga prusisyon.
Dapat soboot na marhay an satuyang pakikitungo sa ibang tawo asin dae mag-untok an pagtubod sa mga bagay na external kundi an totoong pagbabago an dapat internal, boot sabihon marhay an kaisipan, ugali siringman pakikitungo sa Kagurangnan.
Dugang pa ni Father Joey, pigtatawan nin importansiya ngunyan na aldaw an pangaran na Hesus Nazareno bako sa pagigin itom kaini kundi an debosyon mismo ki Hesus Nazareno.
Mientrastanto, kung babalikan man soboot an istorya kan pagselebrar sa kafiestahan kan Itom na Nazareno an puon pa kan 16th century, pinakagurang sa mga debosyon kan tawo.
Sa ngunyan, hagad na sana ni Father Joey padanayon an mga adal na gikan sa buhay ni Hesus tanganing magin giya sa pang-ara-aldaw na paghampang sa mga huma kan buhay.
