NAGA CITY- Dead on arrival an sarong paratukdo makalihis makatalsik asin magulongan kan sarong kotse sa National Highway, kan Sitio Sampaloc, Brgy. Ibabang Pasabangon, Pagbilao, Quezon.
Binisto an binawian nin buhay na si Ma Isabel Roga Vargas, 59-anyos, asin an lugadan na si Alyas Felipen, 62-anyos parehong residente kan Balubad Atimonan Quezon.
Sa nagunong impormasyon kan Bombo Radyo Naga sa Quezon Police Provincial Office, napag-araman na mantang pigbabagtas kan sarong alyas Albert, 32-anyos residente kan Santos Ave San Dionisio Parañaque City gamit an sarong Toyota an nasambitan ng highway (Inner Lane) gikan south bound pasiring north bound, kan magulongan kaini an lawas ni Vargas.
Mientrastantao, antes pa an insidente, pigbabagtas man kan sarong alyas Felipe, gamit an motorsiklo na igwa nin sidecar an outer lane kan kaparehong deriksyon kan mawaran ini nin kontrol asin makabudal sa concrete ramp na nakalaog sa tuong parte kan nasambitan ng Highway.
Huli sa kusog kan impact, narata an driver mantang nakaapon man an pasahero kaining si Vargas rason tanganing magulongan ini kan behikulong pinagmamaneho ni alyas Albert.
Huli man digdi nagsapo nin lugad sa manlaen-laen na parte kan saindang lawas si alyas Felipe asin Vargas na tolos man pigdara sa ospital para sa asistensya medikal alagad pigdeklarar man sanang Dead on Arrival si Vargas.
Sa ngunyan, nagpapadagos pa an pigsasagibong imbestigasyon kan mga otoridad dapit sa nasambitan ng insidente.
