NAGA CITY- Nangapudan an sarong paratukdo sa La Purisima Pili National High School sa mga estudyante na likayan an pag-aabsent huli sa learning loss na pigwalat pa kan mga nakalihis na bagyo.
Sa entrevista kan Bombo Radyo Naga ki Josephine Montaña, School Head kan nasambitan ng eskwelahan, sinaysay kaini na ngunyan na aldaw, nagbaba an numero kan mga estudyante na naglaog sa klase.
Sa ibong kaini, pigpadagos pa man giraray an pagklase asin nagpaabot na sana nin mensahe an saindang mga paratukdo sa mga nag-absent na magcatch up sa klase. Mantang an ibang section na tulong estudyante sana an naglaog, pigsalak na sana ini sa iba pang section tanganing dae man madipisilan an paratukdo.
Mientrastanto, ini man soboot an premirong pagkakataon na naeksperyensiyahan ni Montaña, an siring na pangyayari sa eskwelahan na didiit na maray an nagralaog. Paliwanag man kaini, alanganin kaya an aldaw kan pagbweltada kan klase alagad pigtawan-duon kan paratukdo na bako ining rason tanganing mag-absent an mga estudyante orog na ta pigbabawi pa an mga aldaw kan mga nasayang huli sa mga class suspension huli sa mga nakalihis na bagyo na nagtama sa nasyon.
Sa ibong na lado, kan nakalihis man na Disyembre, 2024, nagsagibo man sinda nin make-up class kada aldaw nin Sabado alagad dae man soboot ini nagin successful nin huli ta pipira man sana an naglalaog asin nakiulay man an mga magurang na dae na pagpalaogon an mga saindang mga aki pagsabado orog na ta may mga trabaho man ini.
Sa ngunyan, pangapodan na sana ni Montaña sa mga magurang na tabangan an saindang lado na enkaminaron an saindang mga aki na magklase asin likayan an mga pag-absent tanganing mapanuan an mga learning losses kan mga ini.
