Binawian nin buhay an sarong Pilipinang senior citizen makalihis matamaan kan natumbang kahoy huli sa panlalamasa ni Bagyong Milton sa Tampa, Florida.
Binisto an biktima na si Luisa Santos, 73-anyos, sarong operator kan Oakland Manor Assisted Living, sarong pasilidad na nag-aataman sa mga senior citizens.
Sigun sa mga report, mawot ni Santos na linigon an mga natumba na kahoy asin sanga sa palibot kan pasilidad tanganing masierto an kasalbaduhan kan 28 na senior residence.
Pigsaysay man kan agom ni Luisa na ini an nagpuputol nin sanga kan biglang nahulog sa saiya an sarong dakulang sanga, na nagresulta sa saiyang kagadanan.
Pigkumpirmar ni Consul Jahzeel Cruz kan Embahada kan Pilipinas sa Washington, DC na nagtatabang si Santos sa paglinig kasunod kan bagyo kan mangyari an aksidente.
