NAGA CITY- Kinumpirmar ngunian kan ina ni Lheslie de Lima na igwa nang eskwelahan na nagkukua sa saiyang aki makalihis magpahiling nin tibay asin tallento sa athletics.
Sa entrevista kan Bombo Radyo Naga ki Analyn de Lima kan Baao, Camarines Sur, sinaysay kaining naaraman sana ninda na nakasungkit nin gintong medalya sa nagpapadagos na Palarong Pambansa an aki makalihis na madangog kan kataid harong ninda sa Bombo Radyo an nasambitan ng bareta.
Sigon ki De Lima, grade five pa sana si Lheslie kan mahilig na ini sa athletics asin nagpadagos na hasta sa pagtuntong kaini sa highschool.
Huli suboot sa potensyal kaini sa nasambitan ng kawat, may sarong dakulang eskwelahan an tulos na nagkainteres digdi alagad dai sinda nagtugot huli ta habo suboot nindang maparayo an aki.
Dugang pa kaini, dai man napapabayaan ni Lheslie an academics kun sain honor student pa suboot ini sa Baao National High School.
Napag araman na haloy nang dai nakakapuli sa saindang harong an gold medallist huli sa dagos dagos na training makalihis an Palarong Bicol.
Sa presente, naglalaom man an saiyang ina na matrayumpo pa siya sa ibang athletics events na saiyang sasalihan sa Palarong Pambansa 2018.
