Pighirang kan Supreme Court (SC) si retired Philippine National Police (PNP) General Manuel R. Gaerlan komo enot na Judiciary’s Chief Marshal sa irarom kan bagong tatag na Office of the Judiciary Marshal (OJM).
Nanumpa si Gaerlan sa saiyang posisyon kasuodma, Marso 10, sa hampang ni Chief Justice Alexander Gesmundo sa session hall kan Korte Suprema.
Ipapautob ni Gaerlan an Judiciary Marshals Act, na obheto an seguridad, kasalbaduhan, asin proteksiyon para sa mga miyembros, opisyal, kawani, asin pagsasadiri kan gabos kan korte suprema sa nasyon.
An Office of the Judiciary Marshal an pigtatag sa irarom kan Republic Act No. 11691 na pigpasar kan nakalihis na taong-2022, kun saen matao nin proteksiyon sa integridad kan paglilitis sa gabos na korte sa Pilipinas.
Apwera digde, an Office of the Judiciary Marshal man an masirbe sa irarom kan direktang pamamayuhan asin kontrol kan SC kun saen igwang kapangyarihang magsagibo nin imbestigasyon, magsagibo nin lehitimong pag-arestar dapit sa graft asin corruption, asin magtabang sa pagpapautob nin mga writs asin proseso kan korte.
Siring man, an Office of the Judiciary Marshal an igwang kapangyarihan mag imbestigar sa mga krimeng ginibo kontra sa miyembros kan judiciary pati na man sa mga akusasyon kan katiwalian sa laog kan hudikatura.
Igwang kakayanan man an Office of the Judiciary Marshal na mag isyu nin subpoena, mag-aplay nin mga oaths asin mag-access nin mga public records gikan sa mga ibang ahensiya kan gobyerno, mantang nagsusunod sa mga probisyon kan Data Privacy Act.
