NAGA CITY- Nagpaluwas na an Commission on Elections nin schedule kan mga aktibidad, procedure, asin regulations para sa gigibuhong National and Local Elections sa masunod na taong 2025.
Sa irarom kan Resolution No. 10999, pigtakda kan Comelec En Banc an election period puon Enero 12, 2025 hasta Hunyo 11, 2025 mantang ipapautob man an gun sa bilog na nasyon sa laog kan 150 na aldaw.
Sa Setyembre 30, 2024 man pigtakda an huring aldaw kan voter registration period. Sa pag-abot kan Oktubre 1, 2024 hasta Oktubre 8, 2024 bubukasan an filing of certificates of candidacy kun sain pagtutugutan an pagsusunad nin Certificates of nomination asin acceptance of nomination para sa mga party list groups.
Kasunod kaini, pupuonan na man an 90 aldaw campaign period para sa mga national candidates puon Pebrero 11, 2025 hasta Mayo 10, 2025.
Mantang sa Marso 28, 2025 hasta Mayo 10, 2025 tutugutan na mangampanya an mga local candidates para sa district representation kan House of Representatives.
Mientrastanto, an voting period para sa mga Pilipinong nasa ibang nasyon, isasagibo puon Abril 13, 2025 hasta Mayo 12, 2025.
Mantang an local absentee voting man para sa mga miyembro kan kapulisan, kasundaluhan, asin media, gigibuhon puon Abril 28, 2025 hasta Abril 30, 2025. Mapautob na man nin liquor ban sa bisperas kan aldaw nin eleksyon sa Mayo 11.
Mientrastanto, apwera sa mga ini, kabali man sa mga importanteng petsa iyo an mga minasunod: Aug. 31, 2024–Last day of “Register Anywhere” Program, Sept. 1 to 28, 2024–Peryodo para sa holding political conventions kan mga parties na magpili o mag-nominate nin kandidato asin June 11, 2025–Last day kan filing nin statement of contributions and expenditures.
