Ginisa kan mga Senador-Judge an itinuturing na hostile witness na si Office of the Vice President (OVP) Special Disbursing Officer (SDO) Gina Acosta sa pagpapadagos kan interjections sa ika-17 na aldaw kan Impeachment Trial laban ki Vice President Sara Duterte.
Binuksan ni Senator-Judge Francis “Kiko” Pangilinan an pagtaram tungkol sa kung maituturing suboot na opisyal na disbursement an pagtao kan confidential funds ki Col. Raymund Lachica, o kun an tunay na disbursement iyo an mismong pagbabayad sa mga confidential informant asin operasyon. Maski iginiit ni Acosta na disbursement hali sa saiyang panig an pag-release kan pondo ki Lachica, inamin niya na igwa pa man siyang obligasyon komo accountable officer.
Dai man nakumbinsi si Pangilinan asin sinang-ayunan ni Senate President Sherwin Gatchalian na mayo nin sapat na dokumento si Acosta tanganing mapatunayan na tama an paggasto, apwera pa sa dai niya personal na nasaksihan an pagtao kan kwarta sa mga sinasabing recipient.
Kinuwestiyon man ni Senator-Judge Erwin Tulfo kun tan dai binalaan ni Acosta si Lachica asin an bise presidente tungkol sa mga nadududang pangaran arog kan “Piattos,” “Chipi Macdonald,” asin “Belat” na isinumite sa liquidation report para sa Commission on Audit (COA).
Sinundan ini kan mainit na pagtaram ni Senator-Judge Raffy Tulfo kun itinuturing suboot ni Acosta an saiyang sadiri komo “smart, average, o stupid. Kan magsimbag an testigo na “average” sana siya, tinawan doon kan senador na an sarong ordinaryong tawo tulos na maduda sa mga pekeng identidad na nakasurat sa Acknowledgement Receipts. Kan tawan doon ni Acosta na nagsunod sana siya hul sinabi ni Lachica na confidential an operasyon, tahasang inapod ni Tulfo si Acosta na “stupid in the name of blind loyalty” huli sa buta na pagsunod sa mga opisyal.
Ikinadismaya man ni Senator-Judge Panfilo “Ping” Lacson an simbag ni Acosta huli mayo man siyang nakuang malinaw na simbag pagkatapos kan pirang beses na pagrason kan testigo na ipinagkatiwala sana niya an confidential and intelligence funds ki Lachica segun sa kasuguon ni Duterte.
Mientrastanto, binusisi ni Senator-Judge Joel Villanueva an naging kalakaran ni Acosta hale kan SDO pa siya sa Davao City Mayor’s Office sagkod sa OVP.
Tinuyaw ni Villanueva na maski igwa nang ipiluwas na Audit Observation Memorandum, Notice of Suspension, asin Notice of Disallowance an COA, dai pa man nagbago an sistema ni Acosta huli sa nagpapahiling naging komportable na siya sa saiyang nakagawian sa Davao kun sain dai siya nagkaaberya.
Inamin ni Acosta sa pagtaram ni Senator-Judge Risa Hontiveros na aram niyang siya an pangenot na mananagot asin puwedeng mag-atubang nin kaukulang kaso kun mapatunayan na igwa nin iregularidad sa paggamit kan pondo. Alagad maski siring, bilog pa man an saiyang pagsarig ki Vice President Duterte.
