Naghurot an American rap mogul na si Sean “Diddy” Combs sa korte nin apelar sa Estados Unidos na ini an paramientras na palibrehon sa pagkakakulong asin dagusan nang ibasura an naging hatol kontra sa saiya katakod kan duwang kaso na igwang kinaaraman sa prostitusyon.
Sa saiyang apelar, pigtawan duon kan kampo ni Combs na sala asin nagbalgar sa ley an pigpataw na 50-bulang sentensiya o labi apat (4) na taong pagkakakulong, asin pigsaysay na an mga aksyong ginamit komo batayan kan pag-hatol an dae dapat na ikonsederar na kriminal.
Komo alternatibo,pighagad pa kan saiyang abogado na liwat tawan nin bagong sentensiya an rapper kun dae man dagusang ibasura an kaso.
Marurumduman sa panahon kan paglilitis, inakusaran si Combs nin pagpirit na makipagtalik sa nagkapirang kababaihan gamit an saiyang kapangyarihan asin impluwensiya sa industriya kan musika.
Alagad ini an napawarang-sala sa mas magagabat na kaso siring kan sex trafficking asin racketeering.
Sa ibong kaini, napatotoohan na nagkasala si Combs sa pagdadara nin tawo tanganing maimbwelto sa prostitusyon.
Sa desisyon kan hukuman pigsaysay na dae bastante an mga nagibong kamarhayan asin kontribusyon ni Combs tanganing mapawalang-bisa an saiyang pagkakasala.
Mientrastanto, padagos man ining nahahampang sa nagkapirang kasong sibil na igwang kinaaraman sa soboot sexual abuse, na maduon man pigpahimutikan kan saiyang mga abogado.
