Pig-utob na ni Securities and Exchange Commission (SEC) Chairperson Francis Lim an nagin promesa kaini sa enot na aldaw kan pagtukaw kaini sa pwesto.
Ini an sa paagi kan pagtatao nin reasonableng pagbawas sa mga bayadan sa mga micro, small and medium enterprises (MSME).
Sa iniluwas kaining Memorandum Circular 8 kan nakalihis na Hulyo 16, mawot nindang matawan nin suporta tanganing maglago an mga MSME sa paagi kan pagtatao nin discounted rates sa nagkapirang mga filing fees.
Nakasaysay sa nasambitan ng memorandum na an anuman na MSME na mawot magrehistro sa corporation an matatawan nin 20 percent discount sa mga registration fees.
Mantang an mga MSME na mawot na dugangan an saindang capital stock sa paagi kan pag-amyenda kan saindang articles of incorporation an matatawan nin 25 percent discount filing.
An mga discounted rates an magigin epektibo sa Disyembre 31, 2025.
