NAGA CITY- Kasado na ang isasagawang Second Trillion Peso March mamayang hapon sa lungsod ng Naga.
Sa panayam ng Bombo Radyo Naga kay Jen Nagrampa (Chairperson, Bicolana Gabriela), sinabi nito na ang naturang rally ay papangunahan ng Simbahan ng Romano Katoliko at mga paaralan sa nasabing lungsod na kung saan 46 na grupo ng simbahan sa buong bansa ang kumpirmadong lalahok.
Daang-daang mga Bicolano, ibat-ibang sektor at mga concerned Filipinos ang muling makikiisa sa isasagawang martsa sa lungsod na kung saan an nasabing malawang prayer-protest rally kontra sa sistematikong korapsyon ang panawagan sa patuloy na pagnanakaw sa taumbayan ng trilyones na pondo .
Ang kaibahan ng pagtitipon sa Naga kumpara sa Metro Manila ay mas nakatuon ito sa panalangin, inspirational talk, panawagan, misa, at candle lighting.
Kaugnay na man nito, magkakaroon ng road closures o pagsara ng ibat-ibang mga kalsada sa lungsod simula mamayang ala-1 ng hapon.
Maliban dito, ang Bayan Bikol at Bayan Camarines Sur, makikiisa rin bukas, Nobyembre 30 sa isasagawa ring rally sa Naga pati na rin sa Legazpi na lalahukan ng ibat ibang grupo, propesyunal, academes, mga kabataan, mga mangagawa, mga kababaihan at iba pa kasabay ng Nationwide protest.
Ayon kay Nagrampa, hindi dapat na mapagod sa panawagan sa usaping korapsyon dahil sa ganitong paraan, nagkakaroon na ng resulta, na kung saan mayroon nang napapanagot o nakukulong bilang parusa sa mga sangkot sa nagsasagawa ng katiwalain sa bansa.
Naniniwala pa ito na hindi dapat matapos sa pagkakakulong lamang ng ibang DPWH Officials at mga Engineers na sangkot sa flood control scandals kundi dapat kasama pati ang mismong nagpasimula ng ganitong anomalya.
Hangad pa ng opsiyal na mailapag sa pagkilos an tinatawag na alternatibong transition council o ang caretaker environment ang pansamantalang mamahala sa gobyerno sa oras na magbitiw sa pwesto si Presidente BongBong Marcos Jr at Bise Presidente Sara Duterte na aniya pawang may bahid ng korapsyon.
Sa kabilang banda, tiniyak naman ng Lokal na Gobyerno ng Naga na nakahanda sila sa nasabing aktibidad at magdedeploy ng mga tauhan upang masiguro ang kaligtasan ng mga lalahok sa lungsod.
Sa ngayon, hangarin pa ni Nagrampa na hindi na maranasan pa ng mga susunod na henerasyon ang nangyayari sa kasalukuyang malalang kalagayan ng bansa dahil sa korapsyon at katiwalian.
