NAGA CITY- Pigsierto kan MEPO Security an seguridad kan mga paratienda asin mga parabakal sa Naga City People’s Mall (NCPM) orog na ngunyan na bisperas kan bagong taon na dagsa an mga tawo.
Sa entrevista kan Bombo Radyo Naga ki Namerto Punzalan, Chief kan MEPO Security, sinaysay kaini na padagos an saindang pagmonitor ngunyan na aldaw orog na ta ngunyan an huring aldaw kan taon. Apwera pa digdi, mahigot an saindang pagbabantay sa trapiko sa kacentrohan.
Sigun ki Punzalan, puon pa kan kapaskuhan hasta sa ngunyan, an mayo pa nin naikukurit na nakumpiskar na mga paninda asin anu man na insidente siring kan panghahabon apwera sana sa mga paratienda na haros nasasakop na an tinampo. Alagad piglinaw kan opisyal na namamanehar man ninda ini.
Mientrastanto, nagin marhay man soboot an bentahan kan mga paputok sa NCPO asin igwa man nin mga security an nakaantabay asin nagmomonitor digdi para naman sa kasalbadohan kan mga paratienda asin parasaod.
Katakod kaini, nakiulay man an opisyal sa mga paratienda na sa ibong kan saindang pagtugot na magtinda sa gilid kan tinampo sa kacentrohan, siertohon man kan mga ini na nag-uutob sinda sa mga panundon, siringna sana sa tamang timbang kan kilohan.
