NAGA CITY – Pagtaong onra sa sakripisyo, pagal, asin dakulang gampanon sa komunidad kan mga kababaihan, ini man an boot sabihon kan selebrasyon kan Wowen’s Month ngunyan na bulan kan Marso para sa sarong Ina asin paratukdo.
Sigun ki Dr. Cindy Coderis, College Professor kan CBSUA Calabanga, an selebrasyon kan Wowen’s Month an sarong paagi tanganing ipabisto asin ipagirumdom sa gabos an dakulang role na piggagampanan o pasan kan sarong babae sa kinaban.
Ini soboot an pagigin nanay asin career wowen na nagpapahiling kun gurano katibay an sarong babae sa pagbaranga kan saiyang oras siring man an pag set nin priority sa ara-aldaw.
Dugang pa ni Coderis, dae madali na pagsabayon an pagigin Ina asin trabaho, nangangaipuhan soboot ini nin labing pagtitiyaga asin determinasyon tanganing mapagtrayumpuhan kan sarong babae.
An pagkakaigwa nin time management an saro pa sa mga kinakaipuhan tanganing mabalanse an mga gibuhon kan sarong tawo. Katakod kaini, pig-ako man kan professor na minsan dae ini nauutob huli sa manlaen-laen na rason asin sitwasyon.
Kun kaya pirmeng magtagama nin oras para sa mga tawong importante sa sarong tawo tanganing dae mapabayaan an pamilya, salud, asin magin an career na pinili.
Sa ngunyan, kasabay kan selebrasyon kan Wowen’s Month hagad na sana kaini na an gabos na mga kababaihan sa bilog na kinaban an magin proud sa saindang mga sadiri asin pirme soboot itaas an bandera kan mga kababaihan.
