Sinaysay ni dating Chief Justice Maria Lourdes Sereno na pwedeng akuon ni Sen. Ronald “Bato” Dela Rosa an pagigin utak sa soboot crimes against humanity sa war on drugs tanganing maisalbar si dating Presidente Rodrigo Duterte gikan sa International Criminal Court.
Sigun ki Sereno, pwede soboot magin testigo si Dela Rosa asin kun magigin katubod-tubod an saiyang pahayag, posibleng mapalibre an dating Presidente.
Dugang pa kaini, kun tunay na padangat kan senador si Duterte, dapat kaining akuon an bilog na responsibilidad sa mga nangyaring paggadan sa kampanya kontra droga.
Si Dela Rosa an hepe kan Philippine National Police sa enot na parte kan administrasyong Duterte asin primerong nagpapautob kan madugong drug war.
Pigtawan-duon ni Sereno na dapat pagnilayan kan senador kun nagdara ba nin tamang resulta an saiyang mga nagin aksiyon, orog na ta dae na man nasugpo an ilegal na droga asin panandalian sana an nagin epekto kan takot.
Nagtitinir na kontrobersyal an drug war makalihis na bistuhon kan gobyerno an labi 7,000 na nagadan, mantang pigkakarkulong maabot sa 12,000 an numero sigun sa human rights groups.
Mientrastanto, dae pa naglalaog sa Senado si Dela Rosa puon kan mabaretaang igwang arrest warrant soboot gikan sa ICC, asin nabigo man ining makakua nin temporary restraining order gikan sa Korte Suprema kontra sa pagpapautob kaini.
