Inihayag ni Senate President Pro Tempore Panfilo “Ping” Lacson na dapat soboot matawan nin tyansa sinda Senador Ronald “Bato” Dela Rosa asin Christopher Lawrence “Bong” Go na gamiton an gabos kan legal na remedyo katakod kan posible nindang kaso na pigkakahampang sa International Criminal Court (ICC).
Sigun ki Lacson, dapat igalang an mga lokal na hukuman asin nag-iiral na proseso sa Pilipinas sa anumang lakdang na pwedeng isagibo kan ICC, kasunod kan pagtukoy kina Go asin Dela Rosa komo soboot mga co-perpetrators sa kampanya kontra droga kan dating administrasyon.
Kun igwa soboot iluluwas na warrant of arrest an ICC o anumang foreign court, kinakaipuhang mag-agi ini sa mga lokal na hukuman na iyong maluwas nin kaukulang kasuguan antes ini maipautob sa nasyon.
Dugang pa kan senador, papag-urulayan kan senado an mga posibleng lakdang, kaibahan an anumang tabang na pwedeng itao sa duwang senador.
Pwede man soboot magpa-apod nin caucus si Senate President Vicente” Tito” Sotto III tanganing konsultahon an mga miyembro kan kapulungan.
Sa ibong kaini, sinaysay man ni Lacson na masyado pang amay tanganing matawan nin pinal na posiyon huli ta dae pa nagluluwas an ICC nin bill of particulars na magdedetalye sa eksaktong mga kaso asin posibleng padusa asin pag-aadalan pa soboot kan mga abogado kan senado antes magdesisyon an kapulungan sa anumang nararapat na lakdang.
