Nagkainitan sinda Senator Risa Hontiveros asin Vice President Sara Duterte sa tahaw kan pagdangog kan budget kan Office of the Vice President sa Senado.
Sa pagdangog kan Senate Committee on Finance para sa ₱2.037 billion na 2025 budget kan OVP, nagkasimbagan sinda Hontiveros asin Duterte dapit sa librong igwang titulo na “Isang Kaibigan” kun saen nahapot kan senadora kun dapit saen an nasambitan ng libro.
An libro an igwang alokasyong ₱10 million asin ini an pig-akda mismo ni VP Duterte. Alagad imbes na simbagon ni VP Duterte kun dapit saen an libro, pig-akusaran man kaini na pinupulitika na ni Hontiveros an pondo kan saiyang ahensya.
Pigtawan duon pa kan bise presidente na problema talaga ni Hontiveros an huli ta nakabugtak sa libro an saiyang pangaran asin an mga aki soboot na matatawan nin libro an igwang mga magurang na botante.
Nag-alma man si Hontiveros sa mga akusasyon ni VP Duterte asin dae soboot kaini nagugustuhan an ugali o pakikitungo sa saiya kan panduwang Presidente huli sana sa simple soboot an saiyang hapot na nangangaipuhan nin simpleng simbag asin an mga pigsaysay kan vice president an mayo nang kinaaraman sa budget asin sa paksa na kun saen manunungod an libro.
Pigtampadan man ni Duterte an pahayag ni Hontiveros asin pigsaysay na dae kaini nagugustuhan an ugali kan senadora sabay sumbat na an lehislador an enot na nagbatikos sa saiyang ama na si dating Presidente Rodrigo Duterte makalihis manggana sa eleksyon sa ibong kan pagtabang kaini na mangampanya asin makakua nin boto sa saindang lugar sa Davao City.
Mistulang nag-referee na sa bangayan kan duwa si Senate Committee on Finance Chairperson Grace Poe asin ini na an naghapot dapit sa libro na pigsimbag man ni VP Sara na an explanation an nasa titulo kan libro na “Isang Kaibigan” na dapit sa friendship o pag-amiguhan.
Sa huri, inaprubahan man kan komite an budget kan OVP para sa masunod na taon.
