Dae soboot mapirma si Senator Panfilo “Ping” Lacson sa ratipikasyon kan 2026 budget bill kun ibubusol kan bicameral conference committe an pagpondo sa mga kontrobersiyal na aid programs na pigbatikos kaini komo bagong pandok kan “pork barrel”.
Kaibahan sa pigbatikos kan Senador an kontrobersiyal na P51 billion na pondo para sa Medical Assistance to Indigent and Financially Incapacitated Patients (MAIFIP) kan Department of Health (DOH).
Pigtawan duon pa kan Senador na dapat i-realign an nasambitan ng pondo sa Universal Health Care programs siring kan pagsakop sa gabos kan barangay asin masierto an zero billing.
Pigpunto man ni Sen. Lacson na an guarantee letters gikan sa mga pulitiko matao nin dalan sa patronage politics asin bako an kinakaipuhan na pangangataman sa salud kan mga Pilipino orog na kan mga nagteteos.
Pigrekomendar man kan Senador na pwedeng magkaigwa nin safeguards sa paagi kan special provisions mantang nagpapadagos an bicam deliberations partikular na tanganing mapugulan makontrol an mga tabang pinansiyal na ini nin mayong kaukulang assessment.
Saro pa sa item na pigtukdo kan Senador na nag-eenkaminar digde na dae magpirma an ratipikasyon kan budget an farm-to-market roads project kan department of Agriculture, kun saen doble gikan sa pighahagad kan Presidente na alokasyon kan bicam na nasa P33 billion.
Sa ngunyan, padagos an pag-reconcile kan bicam sa pinal na mga probisyon kan 2026 budget bill. Sa oras na maisapinal na, ibubwelta ini sa halangkaw asin hababang kapulungan kan kongreso para sa ratipikasyon.
