Pigbusisi ni Senator Rodante Marcoleta an paglobo kan confidential funds kan Office of the Secretary kan Department of Justice (DOJ).
Sa budget deliberation para sa DOJ sa masunod na taon, tinukoy ni Marcoleta an ₱526 million confidential fund kan 2023, nagbaba kan nakalihis na taong 2024 sa ₱168 million, asin ngunyan man na 2025, naglangkaw ini sa ₱1.5 billion, o 800 % an inilangkaw sa pondo.
Paliwanag man digde ni Senator Sherwin Gatchalian, na iyong sponsor kan DOJ 2026 budget, an Kongreso an nagpadugang kan labi sa ₱1-bilyon sa confidential funds kan DOJ.
Kabali sa rason kan pagdakula kan pondo an huli ta mainit an imbestigasyon kaidto sa mga nawawarang sabungero asin sa POGO.
Para sa masunod na taon, pighahagad kan DOJ na matawan sinda nin dugang na pondo sa confidential funds huli ta kadakol sindang iniimbestigaran, siring kan mga anomalya sa flood control projects asin an Witness Protection Program na mangangaipuhan nin ₱500 million.
Alagad hinagad ni Marcoleta na tapyasan nin kabanga an confidential funds kan DOJ sa 2026 asin itao an tatapyason digde sa Office of Alternative Dispute Resolution, kun saen nireresolbar an mga kaso na pwede pang ayuson.
Sa masunod na taon, pigpapatawan kan Senate Committee on Finance an DOJ nin ₱729 million na confidential fund.
