Pigkumpirmar ni Senator Kiko Pangilinan na ngunyan na maabot na Nobyembre dadangugon na kan Senate Electoral Tribunal (SET) an quo warranto petition na pigsunad kontra ki Senator Erwin Tulfo.
Si Senator Pangilinan an isa sa mga miyembro kan SET.
Nagpahayag man nin kapreparaduhan si Sen. Erwin na hampangon an quo warranto petition na pigsunad kontra sa saiya kan disbarred lawyer na si Berteni Cataluna Causing.
Sigun sa senador, apat na beses na ining nagfile nin disqualification case kontra sa saiya sa Commission on Elections (COMELEC) huli sa citizenship issue alagad gabos an nabasura.
Pigpurbaran man kaining pugulan an saiyang proklamasyon alagad na-dismiss an panlimang disqualification na pigsunad ni Causing kontra sa saiya.
Sa ika-pitong pagkakataon, liwat ining nagsunad nin disqualification case alagad pig-abisuhan si Causing na sa SET na ini dapat magsunad.
Enkaso man na mabasura an presenteng quo warranto petition kontra sa saiya, piglalaoman na ni Sen. Erwin na sa malamang magsakat na si Causing sa Korte Suprema.
