Pupuonan na kan Senate Committee on Games and Amusement an imbestigasyon sa negatibong epekto kan online gambling sa nasyon sa Huwebes, August 14.
Sigun ki Senate Committee on Games and Amusement Chairman Erwin Tulfo, prayoridad nindang maisalang sa saiyang komitiba an mga prosopwesto asin resolusyon dapit sa epekto kan online gambling na pigkokonsederar na sarong naglalalang krisis na kaipuhang maaksyunan tolos.
Kaibahan sa ipapaapod an mga ahensya kan gobierno siring kan Philippine Amusement and Gaming Corporation (PAGCOR) asin Department of Finance (DOF) kun saen titimbangon an mga pros asin cons kan industriya enkaso ideklarar na ining iligal.
Aram kan Senador an kawaran nin regulasyon sa online gambling kaya mayong kontrol sa pagsusugal an mga tawo asin maski an mga jovenes an nalululong na man sa sugal.
Alagad maski kamawotan ni Tulfo an total ban sa online gambling, kaipuhan pa man giraray na timbangon orog na kun mas magabat an social ills o mga problema sa komunidad na kawsa kaini kumprara sa makukuang kita kan gobierno.
