Nagapan an diitaan ng pag-shutdown kan gobyerno kan Amerika makalihis maisumiter na kan US Congress an budget deal. Naenot ng pig aprobaran kan US House of Representatives an nasambitan ng bill sa botong 366-34 asin makalihis an sarong oras pig habol kan US Senate an pagsumiter kaini sa botong 85-11 dawa na lagpas ini nin labing kabangang oras sa deadline kaining mag oomagahaon kan Sabado, Disyembre 21.
Sa irarom kan bagong spending plan, papahewason an presenteng fiscal levels hasta sa Marso 14, matao man nin $110 billion para sa relief tangani na matabangan an mga natural-disaster survivors asin aid farmers.
Alagad dae kabali sa pigsumiter na pondo an demand o pighahagad ni President-elect Donald Trump sa mga lehislador na langkawan an debt ceiling kan federal government na nagpapahiling nin limitasyon kan kakayahan ni Trump para manduhan an mga lehislador gikan sa sadiri mismong Partido.
Pig sumiter na an nasambitan ng bill ki US President Joe Biden tanganing ganap na tintaan komo ley.
Sa sarong statement gikan sa tagapagtaram ni Biden, pigkumpirmar kaining pig aprobaran na kan Presidente an nsambitan man na budget deal.
Katakod kaini, naisalbar an Pasko kan nasa labing 800,000 obrero na nanganib na dae masahudan enkaso nadagos an government shutdown mantang pigpa untok kan White House an mga preparasyon kaini para sa shutdown.
Marurumduman, pinakahuring nangyari an government shutdown sa Amerika kan enot na termino ni Trump kan nakalihis na 2019 na naghaloy nin 35 aldaw, an pinakahalabang government shutdown sa historya nin Amerika.
