Ipinagsugo ni Department of Transportation (DOTr) Acting Secretary Giovanni Lopez na ipautob an gabos kan kinakaipuhang lakdang tangani na malikayan an matinding pagsisiksikan sa mga platform kan Metro Rail Transit Line 3 (MRT-3).
Ini an kasunod kan paghagda nin despensa kan MRT-3 sa mga pasahero kaini huli sa matinding pagsisiksikan sa saro sa mga platform kan nakalihis na Lunes, na naglakop sa social media.
Sa sarong pahayag kan Miyerkules, sinaysay kan MRT-3 na an insidente an nangyari bandang 7:25 nin pagkaaga makalihis tugutan an mga pasahero na makalaog sa platform kan tren sa ibong kan umiiral na pagsisiksikan, na nagin kawsa kan labing pagdagsa kan tao kan mag abot an mga pasahero.
Sinaysay man na pinakusog pa kan mga tauhan an pagmomonitor asin koordinasyon tangani mapamarhay an pamamayo kan crowd asin masiguro an mas salbado asin pakarhay na pag-commute orog na sa mga peak hours.
Apwera digde, an MRT-3 an mapakusog kan seguridad nin dae naapektaran an pakarhay na bulos kan mga mga pasahero sa paagi kan pagbubugtak nin walkthrough metal detectors sa mga laugan kan North Avenue, Quezon Avenue, asin GMA-Kamuning stations.
Obheto man kaini na masiguro an kasalbaduhan kan kada komyuter sa paagi kan mas amay na pagtukoy sa ano man na huma o ipinagbabawal na gamit antes na makalaog sa platform. An mga walkthrough metal detectors na ini an dae mahaloy ibubugtak sa gabos kan mga istasyon kan MRT-3.
