NAGA CITY – Nakapreparar na an Holy Cross Parish, Tabuco, Naga City sa papaabuton na kapiyestahan kan Itom na Nazareno na mangyayari sa Enero 9, 2026.
Sa entrevista kan Bombo Radyo Naga ki Nicomedes Sirios III, Presidente kan Hijos De Nazareno, sinaysay kaini na nakalatag na an saindang preparasyon puon pa kan nakalihis na bulan nin Nobyembre kan nakalihis na taon, magin an sainda soboot na katuwang na mga ahensiya, nakaulay na ninda para sa implementasyon kan nasabing selebrasyon.
Dugang pa kaini na piglalaoman na ninda an mas kadakol na tawong ma-atendir sa ibong kan naeeksperyensiyahang pag-uuran sa siyudad na dara kan shearline, huli man ta maski kaidto pa, naeeksperyensiyaan na an siring na panahon.
Ipigheras pa ni Sirios na basado sa saindang obserbasyon, kan mga nakalihis na taon, pirming pano an simbahan na pinagdadausan kan misa asin nobenaryo anuman an kamugtakan kan panahon, kun saen ini an pagpapahiling kan mga deboto kan saindang matatag na pananampalataya sa Diyos.
Katakod kan nasambitan ng kapiyestahan kan Jesus Nazareno, pigheras pa ni Sirios na magkakaigwa nin paghadok sa imahe sa Holy Cross Parish Tabuco, kun saen ini an mangyayari antes asin pagkatapos kan santa misa.
Pigtawan-duon pa ni Sirios na sa saindang pagkarkulo katuwang an Philippine National Police, posibleng magpakol sa rinibong deboto an mapasiring sa siyudad nin Naga tanganing makisumaro sa selebrasyon.
Mientrastanto, saaga man na alas-6 nin pagkahapon mapuon an pagsarado kan nagkapirang tinampo makalihis an replica procession sa may parte kan Biak na Bato hasta sa Enero 9 o an mismong aldaw kan kapiyestahan ni Jesus Nazareno.
