NAGA CITY- Labi ngonyan an pagpapasalamat ni Vice President Leni Robredo sa gabos na mga indibidwal na nag-atendir sa pagselebrar kan ika-60 birth anniversary ni dating Department of Interior and Local Government (DILG) Sec. Jesse Robredo subagong aga na ginibo sa JMR Museum Grounds sa ciudad nin Naga.
Sa sarong pahayag, sinaysay kan Bicolanang bise presidente na dae niya nalilikayan na maisip ano an posibleng pagbabago sa buhay kan saiyang namaaram na agom urog pa ta senior citizen na suboot ini.
Nagibo pang magsuba kan opisyal na posibleng pigti-tina na niya an buhok ni Sec. Jesse huli ta antes pa ini magadan kan taong 2012, kada bulan niya suboot na pigti-tina an buhok kaini.
Mientrastanto, sigon sa bise presidente, kun nabubuhay man ngonyan an depuntong sekretaryo, simple asin matuninong na selebrasyon sana an mawot kaini ngonyan sa saiyang kompleanyo.
Dae suboot nakatudan kan saindang pamilya na magkaigwa nin engrandeng selebrasyon tuyong igwang mga okasyon kaya man tradisyon ninda na magsimba kun kompleanyo kan dating sekretaryo antes ining maglaog sa saiyang trabaho.
Ikinaugma man kan opisyal an pigtaong commemorative asin symbolic senior citizens ID para ki Sec. Jesse.
Tinawan doon man ni Vice President Robredo na bako sana an kompleanyo kan depuntong opisyal an pigrurumdom ngonyan na aldaw, kundi magin an mga nagibo kaini asin naikontribwer sa lado nin ‘good governance’ sa ciudad nin Naga asin sa DILG.
Napag-araman na pasado alas-8:30 nin aga subago kan magpuon an misa na pigkondusir sa JMR Museum Grounds kun saen pig-atendiran ini kan mga opisyal kan nasambitang ciudad, mga kaparyentes asin amigo kan dating sekretaryo.
Pinangenotan man ni Vice President Robredo an ‘Para kay Jess’ exhibit asin an unveiling kan tsinelas art installation sa Museo ni Jesse Robredo.
