NAGA CITY – Parte kan nagpapadagos na pag-andam kan syudad nin Naga kontra sa kalamidad, pinagmarhay kan administrasyon kan Naga City General Hospital na ibosol an sarong simulation exercise para sa linog asin kasulo (earthquake and fire drill) sa Byernes, Oktubre 17, 2025.
Sigun ki Mayor Leni Robredo na bako sanang pagbaha na dara nin bagyo an kaipuhan na antisiparan kan syudad, kundi magin man an mga kalamidad siring kan linog asin kasulo.
Pigtawan duon ni Jommer Arindain, na dae nadedeterminaran kan modernong teknolohiya kun nuarin maabot an sarong pagyugo-yugo o linog sa sarong lugar siring man an kusog kaini, kun kaya dapat na itolod an sarong simulation exercise komo pag andam.An linog sa probinsya nin Cebu nagrehistro nin 6.9 magnitude mantang sa Davao Oriental, 7.5 magnitude.
Sa pigsagibong coordination meeting kan CMO Public Information Division, Disaster Risk Reduction and Management Office, Naga City Police Office, Bureau of Fire Protection-Naga, Public Safety Office asin NCGH personnel, pig urulayan an magigin trabaho kan lambang ahensya antes mangyari, mantang nangyayari, asin makalihis na mangyari an earthquake and fire drill.
Katakod kaini, mahigot na pigpapaaram sa publiko an mapapadapit sa aktibidad na ini tanganing malikayan an pagkawsa nin pagkahandal, karibungan, asin disgrasya o aksidente orog na sa mga mayo nin pagkaaram dapit sa simulation exercise.
