Nagtabang an gobyerno kan Singapore sa pag-ebakwar kan 24 overseas Filipino workers (OFWs) hale sa Jeddah, Saudi Arabia matapos magpadara nin repatriation flight para sa mga namamanwaan kaini na na-stranded huli sa flight disruptions na dara kan tensyon sa Middle East.
Ini an pigkumpirmar kan Malacañang Palace.
Susog ki Singapore Ambassador to the Philippines Constance See, an Republic of Singapore Air Force (RSAF) nagpadara nin A330 Multi-Role Tanker Transport aircraft kan Marso 12, 2026 tanganing ibalik an mga taga-Singapore hale sa Jeddah.
Matapos na enot na tugotan na makasakay an mga taga-Singapore asin an saindang mga pamilya, pigtugotan man na makasakay an nagkapirang mga dayuhan, kaiba an 24 na Pilipino. Pamilya
An eroplano nag-abot sa Singapore kan Marso 13 mga alas 5:59 nin aga.
Sinabi pa kan embahador na posible ini sa paagi kan koordinasyon kan Department of Foreign Affairs (DFA) asin kan Philippine Consulate General sa Jeddah tanganing mapadali an pagsakay kan mga Pinoy sa eroplano.
Sinabi kan Singapore na an lakdang na ini nagpapahiling kan pakikisumaro kan mga nasyon sa ASEAN, kun saen an mga pagtaraid na nasyon nagtatarabangan sa panahon nin krisis tanganing maseguro an ligtas na pagbalik kan saindang mga namamanwaan sa saindang mga pamilya.
