Aram baya nindo mga ka-bombo na sarong kakaibang insidente an nagdara nin kasulo asin paramientras na brownout sa sarong parte kan British Columbia, Canada, makalihis na maaraman kan mga bombero an sarong sira asin gamgam komo pinagpuonan kan kalayo.
Sigun sa Ashcroft Fire Rescue, nagresponde sinda sa sarong grassfire sa timog na banwaan kan Ashcroft, mga 67km sa kanluran kan Kamloops, kan nakalihis na Miyerkules.
Sa tabang kan mga lokal na paraoma asin empleyado kan B.C. Hydro, marekas na naapula an kalayo.
Alagad dakulang kakilhagan kan mga bombero kan mahiling ninda an rason kan kasulo, sarong sulong sira sa paanan kan poste kan kuryente.
Makalihis an imbestigasyon, napag-araman na an sira an nahulog gikan sa sarong osprey, sarong klase kan gamgam na nagkakakan nin sira.
Nagtama ini sa mga linya kan kuryente mantang nahuhulog na nagdara nin mga baga na nagkuriyat sa marang damo asin nagin rason kan kasulo.
Dugang pa kan mga bombero na an pagal na gamgam an pwedeng napiritan na sana na butasan an sira huli sa init kan panahon.
An lugar kan kasulo an haros tolong kilometro an rayo sa pinakaharaning salog, kun saen malamang na nakua kan gamgam an saiyang nadakop na sira.
Sa social media post kan fire department, suba kan mga ini na an “prime suspect” na gamgam an dae nakulogan sa insidente.
Mapakol sa 4,800 galon kan tubig an kinakaipuhan tanganing dagusan na matumtom an kalayo.
Paremientras man na nawaran nin kuryente an lugar huli sa insidente. Sarong pagiromdom sa gabos na maski an kapalibotan an igwang mga paagi kan pagpapasiklab kan kalayo.
