Nagadan an siyam na katawo an asin 40 an nalugadan matapos an pambaabdl kan mga armadong lalaki sa sarong simbahan sa Karak, Jordan, sarong atake na dai pa nangyari asin nagpabigla sa nasyon.
An mga “dai midbid” na armadong lalaki dai pa nadadakop, asin kinumpirma kan public security agency na ini sarong teroristang atake laban sa mga Kristiyano na nag-aatender nin lubong sa Hmoud.
Si King Abdullah kan Jordan nagpahayag na “harshly” nindang babalusan an mga responsable sa “terrorist act,” asin sinabi na “The blood of Jordanians is precious, and we will strike those who transgress against this country with an iron fist.”
Segun sa Petra, an opisyal na news agency kan kahadean, sinabi ni Prime Minister Jafar Hassan na an gabos na ahensya kan estado nagtatrabaho tanganing madakop an mga kagibo kan krimen.
Sarong testigo an nagsabi sa Al-Mamlaka television na an sarong nag-atake may darang AK-47 assault rifle asin nagpadagos an pagpapaputok nin pirang minuto, mantang an saro pang testigo sa CNN nagkumpirma na halawig an atake asin an mga armadong lalaki nagkurahaw nin “Allahu Akbar.”
Bihira an mga sektaryanong atake sa Jordan, kun sain an komunidad nin mga Kristiyano minabilog sana nin 2% kan total na populasyon kan nasyon.
Nag-abot man an pagkokondenar hale sa iba-ibang parte kan rehiyon kasunod kan atake, asin nagdeklara si Hassan nin tulong aldaw na pagmomondo.
