Liwat na pighurot ni Slovenian Foreign Minister Tanja Fajon an suporta kan Slovenia sa 2016 Arbitral Ruling asin pig inkaminar an gabos na nasyon na mag sunod digde antes an saiyang makasaysayang pagbisita sa Pilipinas.
Sigun ki Fajon, mawot kaining ihayag an saiyang solidarity sa nasyon sa pag atubang sa mga hamon sa seguridad asin pang kinaban na ley sa South China Sea o mas bistado komo West Philippine Sea.
An nasyon soboot na Slovenia, dedikado sa international law org na sa UNCLOS (United Nations Convention on the Law of the Sea).
Bako sana soboot ini dapit sa South China Sea kundi sa integridad kan international legal order asin man respeto sa mga rulings kan international tribunals.
Marurumduman kan nakalihis na taong 2016, ibinasura kan Arbitral Tribunal an nine-dash line kan China, alagad padagos ining pigsayumahan kan Beijing.
Sigun sa datos kan nakalihis na Enero 2025, 27 nasyon an hayagan na nag susuporta sa ruling, mantang walo man an nagtututol. Si Fajon, an primerong Slovenian foreign minister na mabisita sa Pilipinas, na yaon sa nasyon gikan Marso 10 hasta 12.
Makikipag meeting ini ki Presidente Ferdinand R. Marcos Jr. asin man Foreign Affairs Secretary Enrique Manalo tangani mas pakusugon an koneksyon na bilateral.
Komo presenteng miyembro kan UN Security Council (2024-2025), aktibong ibubusol kan Slovenia an mga urulay pang kinaban, kabali na an maritime security sa nararani na pag urulay sa irarom kan Greek presidency sa Mayo.
