Nagtao nin patanid an Cybercrime Investigation and Coordinating Center (CICC) sa mga small and medium enterprises (SMEs), dapit sa sarong bagong paagi nin panloloko na ginagamit kan mga cybercriminal.
An bagong modus na ini an naggagamit nin sopistikadong teknolohiya na pig-aapod na deepfake.
Sigun sa CICC, an panlolokong ini an labi pa sa karaniwang phishing, kun saen pigpupurbaran sana na kuonon an sensitibong impormasyon sa paagi kan mga pekeng email o website.
Naggagamit na an mga cybercriminal nin deepfake impersonation, kun saen pig-aarog kan artificial intelligence (AI) an boses asin lalawgon kan mismong mga may-sadiri kan negosyo.
Pangenot na obheto kaini na lokohon asin manipulahon ang mga empleyado kan SME.
Pigsasamantala ninda an teknolohiya tanganing makakua nin sensitibong impormasyon kan kumpanya, siring kan mga password o financial details, o kaya man an tanganing mapatugot an mga empleyado na mag-apruba kan mga pekeng fund transfers o pagbabalyo nin pondo.
Komo pagpapagirumdom, pigtawan duon kan CICC na importante na magin mapanuri asin alerto an gabos kan empleyado.
